政壇：發叔何君堯貼錯門神

屯門鄉委會主席何君堯前日帶埋幾百名村民大鬧新界鄉議局，仲搵人指住鄉議局主席劉皇發嚟鬧，搞到發叔面都青埋。發叔尋日就慨嘆「樹大有枯枝、村大有乞兒」，擺明暗寸何君堯就係鄉議局嘅乞兒。發叔仲話何君堯把口好叻，好識挑釁村民之間嘅矛盾，好在啲村民無聽佢點，如果唔係就大劑喇。

發叔講起前日單嘢，就即刻火都嚟埋，佢話何君堯最叻係人前人後兩個樣，喺佢面前就UNCLE前UNCLE後咁稱呼自己，鬼死咁客氣，但勢估唔到又會拉大隊去鄉議局搞事。究竟何君堯係咪想奪權，發叔就話唔知佢，只係覺得佢搞咁多嘢都只係尋求刺激，根本無乜作為。

爭鄉會主席曾鬧翻

發叔話咁多村民包圍鄉議局，好多都只係人云亦云，被何君堯鼓動至會出嚟搞事，所以自己從來無怪班鄉民，因為唔少新界人都唔知發生緊咩事，搞到咁大都係因為有人喺背後搞小動作。發叔強調，經佢親自向村民講解後，唔少都已經無晒老火，有啲仲覺得係怪錯發叔，當場向佢道歉添，證明道理企喺發叔嗰邊。發叔既然公開向何君堯發炮，我哋當然要問番當事人點睇啦。但我哋尋日打過畀何君堯，電話就長期無人聽。

其實何君堯同發叔兩個都係話服務村民，但兩年幾前已因屯門鄉委會主席之爭產生「裂痕」，之後就好似貼錯門神咁，到今年佢要選立法會，又主動同發叔修補關係，絕對係「有事就求人，無事就關人」嘅最佳人辦。