西九淪為富貴場 文化藝術大隻講

乜嘢叫做見錢開眼？乜嘢叫做不務正業？睇睇西九管理局就知喇。

話說西九文化區第一期設施將於明年動工，而閒置嘅土地一向以短期租約形式租予不同團體舉辦文化或藝術活動，例如音樂會、粵劇戲棚等等。點知最近西九管理局一味向錢看，竟然將西九海濱長廊嘅無敵海景用地租畀富豪舉辦童話式婚禮，令文化區淪為私人派對場所，問你服未！

顧名思義，西九文化區應該用嚟舉辦文化藝術活動，因乜事幹會租畀富豪舉辦私人婚宴呢？西九董事局成員話喎，西九文化區明年至動工，為咗增加財政收入及試驗營運模式，董事局授權西九管理層可以短期形式將土地出租，但必須與文化藝術有關，以及公眾能夠高度參與。即係咁，出租場地增加收入，都算係善用資源，無可厚非嘅，問題係，舉辦私人婚宴同文化藝術風馬牛不相及，咁又點解釋呢？公眾又點樣能夠高度參與吖？

西九傳訊及推廣行政總監係咁講嘅，今次係以「市價」租出場地兩周予新人舉辦婚禮，基於商業考慮不能公開收費，只係好肯定唔止幾百萬喎。嗱，係咪以市價租出好難講，最令人擔心嘅係此例一開，今次有人搞婚禮，下次話唔定有人開生日派對或者擺壽宴，香港大把有錢人，西九容乜易成為富豪專用場地o架。

講到呢度，太一叮突然諗起最近熱爆網絡嘅「五百蚊人情港女」，有人明言做五百蚊人情嘅賓客出手太低，冇資格嚟飲佢嗰餐。其實西九管理局都係差唔多o架咋，只要出得起錢，鍾意喺西九搞乜都得。正如立法會議員話齋，西九管理層見錢開眼，而且黑箱作業，有錢就可以開派對，無錢就要去排隊租場，話之你係咪同文化藝術有關喇。所以話啫，所謂世界級文化藝術區，根本就係吹水唔抹嘴。

講開又講，西九發展大計前後吹咗十幾二十年，依家仲係十畫未有一撇，講起都笑死人。港府把口話支持文化藝術，實際上係葉公好龍，一味向錢看，既然係咁，不如索性賣咗塊地起豪宅好過喇，反正依家土地資源咁缺乏，填海被指破壞環保，發展新界東北又被人鬧「割地賣港」，西九塊地閒閒哋值幾百億，賣咗佢一了百了，好過搞乜嘢文化藝術整色整水，唔湯唔水，係咪！