政壇：搞搞政：阿Rock選人大教界憂染紅

自從傳出身兼全國青聯副主席同考評局主席嘅阿Rock陳仲尼有意參選人大後，教育界好大反彈，擔心佢做咗人大後，令考評局染紅，分分鐘連通識科都滲透「極紅」思想。

十位教育界選委尋日聯署發表公開信，包括教協副會長黃克廉、理事韓連山、潘天賜同區伯權等，反對阿Rock參選人大代表。佢哋要求阿Rock選人大就要先辭去考評局主席一職，因為過去咁多屆主席，都未有人身兼政府部門或議會職位，如果主席兼任人大代表，擔心會有角色衝突，影響考評局政治中立同獨立形象，假如阿Rock唔肯辭職選人大嘅話，佢哋話抗議行動一定陸續有嚟。

阿Rock尋日回覆我哋查詢時話，人大職務只係參與國事，為國家擔任立法角色，而考評局只負責香港事務，兩者分得好開。佢仲強調考評局主席唔會負責改試卷，亦唔到佢訂立評分準則同考試題目，主席只負責考評局嘅機構管治、財政、人力資源同資訊科技，唔會有角色衝突。至於係咪參選人大，佢話仲考慮中，總之自己無論做咩崗位都問心無愧喎！