政壇：工聯會失首席地位

工聯會同泛民主派喺長者生活津貼撥款申請事宜上聯手大打拉布戰，令全港四十萬長者到依家未能受惠。究竟工聯會咁做有冇失分？睇番最新民調結果就知一二，本來喺「十大政團」排名榜首嘅工聯會，長津一役後燉到落第三位，跌幅係十大政黨之首。如果工聯會繼續反對長津，真係唔知會流失幾多支持者喇！

嫻姐被叫停收聲

港大民意研究計劃呢次嘅調查喺十一月八號到十五號，啱啱係立法會財委會第四度審議長津之後，工聯會得分由五十一點一分，大降至四十九點六分，畀街工同民協爬上第一同第二位，認真失威。睇番當時工聯會嘅取態都幾進退失據，本來話大力反對七十歲以上要資產審查嘅陳婉嫻，已被工聯會內部叫停收聲，改由另一女將麥美娟上陣，但佢哋又唔敢得失老人家，所以依家都未表態投乜嘢票，令工聯會支持者大為失望。

同樣係拉布，社民連同人民力量支持度不跌反升，當中社民連嘅升幅更加最高，由三十四點八分升至三十七點四分。點解有呢個分野？其實好易理解，工聯會本身係建制派，但扮到泛民咁當然失分啦。即係好似踢波咁，你明明負責做後衞，又懶叻跑去做前鋒，入唔到波又令中門大開，球迷當然唔妥你啦。希望工聯會睇到民調結果後，盡快回頭是岸支持長津啦。