古宅竟可變豪宅 保育原來隨口噏

曾蔭權，又係曾蔭權，香港成日有咁多珍貴古蹟被消失，點解呢件官場古蹟遲遲都唔肯自動消失？喂，過氣特首搞到臭名遠播，仲妙想天開做國家領導人，篤眼篤鼻，好有礙觀瞻o架！

貪曾又做咗邊啲衰嘢，激到大家咁勞氣？唔通又搞黐飲黐食嘅貪腐勾當？又搞私相授受嘅「曾商勾結」？唔係，今次正正因為佢乜都無做，任內翹埋雙手唔做嘢，結果搞出一場保育鬧劇。

件事係咁嘅，話說薄扶林有一幢譚雅士古宅，擁有八十年歷史，係本港少有僅存嘅歐洲式樓房，極具保育價值。古宅○四年申請清拆，當局以暫定古蹟為名喝停，之後仲訂立保育方案，容許業主喺同一地皮興建兩幢住宅，前提係古宅須改為住宅會所，每星期開放一日畀公眾參觀。點知古宅業主突然變卦，改口興建住宅由兩幢變一幢，而古宅就會拆建為四個豪宅單位，嚴禁市民入內，公眾只能喺古宅外嘅公眾觀賞區遠望外貌。

又多一幢歷史建築面臨清拆厄運，大家係咪好惋惜、好無奈、好疑惑呢？明明連保育方案都訂下，點解業主可以隨時反口咁兒戲嘅？咪就係當局無做嘢囉，保育方案居然無白紙黑字簽約作實，即係純粹齋噏，古蹟建築唔逐一消失至奇啦。

叮佢個鎯鎯，你話港府點做嘢o架？唔係，應該係你話貪曾領導嘅舊政府有無做嘢？八年流流長，一直都無跟進古宅保育方案，如果古宅真係被夷為平地，唔通罰貪曾赤膊上陣做泥水工人將佢還原咩！

講到呢度，大家清楚睇到兩個事實。一個係當局嘅保育工作敷衍到極，成副官僚機器好似一件結滿蠄蟧絲網嘅殘舊古董，中看不中用，睇嚟最急需保育嘅就係佢哋。一個貪曾胡混七年留低數之不盡咁多蘇州屎，發展中醫藥業係齋噏，改善空氣污染係齋噏，推動六大產業係齋噏，保育古蹟亦係齋噏……唯一唔係吹水嘅係，香港喺呢套狗噏管治之下已經變成一個千瘡百孔嘅爛棋局。

最匪夷所思嘅係，竟然有傳聞話貪曾呢件醜陋殘破嘅官場古蹟可能得到關照保育，「升呢」做全國政協副主席。如果真係嘅話，香港暴動都似！

一句講晒，古宅竟可變豪宅，保育原來隨口噏。無計啦，爛棋局都要收拾殘局o架，新政府速速補鑊啦，唔好搞到古蹟建築一座二座湮沒豪宅群堆！