政壇：搞搞政：邵善波見招拆招擋亂箭

中央政策組首席顧問邵善波尋日向立法會申請加開嘅非公務員全職顧問職位，年薪及福利達二百八十萬元。佢解釋，中策組喺上屆政府嘅分工唔係太有系統，而且一直冇全職顧問負責監察民意，所以佢希望強化中策組喺發掘同培養人才方面、同埋喺電子媒體以及網上平台監察民意嘅功能。

面對中策組擴大職能，一向同政府對着幹嘅泛民都技窮。白鴿黨劉慧卿搬番邵善波日前有關政府面對社會批評亦要推動輿論、唔可以坐喺度捱打嘅言論老屈邵善波，話佢令公務員成為政治工具，仲話希望邵善波當日係最後一次發言喎。邵善波即刻反駁點解佢唔可以發言，又澄清要推動輿論嘅係政府，唔係中策組，叫卿姐聽清楚個訪問錄音先。

工黨李卓人例牌鬧加職位係架床疊屋，仲將中策組同內地社科院、中宣部、組職部畫上等號，質疑全職顧問高靜芝發掘人才係為咗安置「梁粉」，話決策局搵人時要通知高靜芝，等佢畀意見係弄權。邵善波就反駁話：「呢個唔係高女士發嘅指示，係特首發嘅指示」。對於被指「僭建」中策組，佢就話「我哋點會害自己，請一個人唔做嘢係冇好處o架！」就係咁，三扒兩撥，將啲箭擋晒。