政壇：公專聯力邀李國麟埋堆
喺今屆立法會選舉一舉贏得兩席嘅公專聯，曾經諗過邀請教育界葉建源加入壯大聲勢，可惜對方請佢哋食檸檬。公專聯當然唔會就此罷休，誓要繼續搵多啲功能界別議員加盟，喺立會內勢孤力弱冇人理。據聞佢哋現已將目標移至衞生服務界李國麟，會計界梁繼昌承認有搵過對方加盟，但對方態度曖昧，搞到佢無奈話：「同佢提就提咗幾次，但冇理由日日問人哋諗成點o架嘛！」
究竟李國麟又點諗呢？佢話同泛民議員喺民生議題上一向維持良好合作，而同公專聯嘅邂逅就始於財務委員會審議長者生活津貼撥款，又透露大家當時都傾過有冇進一步合作機會，但最後都係冇結論。佢又話對加入聯盟嘅態度開放，又用「傾吓無壞嘅」作總結。既然Joseph都咁講，公專聯應該要再花心思游說吓喇，話唔定「三顧草廬」可以打動對方呢！