政壇：長毛怪招嚇退推銷電話

政制及內地事務局尋日去立法會簡介就纏繞法收集得嘅意見，社民連「長毛」梁國雄話，如果當局可以確保新聞自由不受侵犯，佢非常樂意政府盡快立法制約纏繞行為，尤其係對付收數等滋擾性嘅活動。

長毛仲自爆依家日日都收到唔少銀行或財務公司嘅廣告電話，問佢經濟有冇困難，使唔使借錢周轉。雖然成日畀人話佢拉布滋擾他人，但對住呢啲騷擾嘅推銷電話，佢都話冇晒符喎！

經過無數次電話廣告騷擾後，長毛已經對佢哋嘅銷售策略非常熟悉，有時仲會諗計反寸對方。例如有人問佢借唔借錢，佢就會用一副非常認真嘅口脗答：「我想借二億，你借唔借呀？」對方一聽到就知道佢喺度玩嘢，通常會即刻收線唔睬佢。佢又話仲有人日日打幾百個電話畀佢，但由於嗰啲人設定咗隱藏來電，所以佢都唔知係邊個打來。

長毛話呢啲滋擾性行為真係唔可以縱容，但由於唔知來電者姓甚名誰，所以就算報警都唔知警察可以點阻止喎。