政壇：黃成智無處容身

白鴿黨喺立法會選舉受到重挫，新界東同新界西直選議員由四人銳減至一人，無可避免要重新調配資源，首當其衝係落選議員要騰空房署辦事處供當選議員抽籤，據聞白鴿黨亦好頭痛點分配僅有資源，而落選嘅黃成智更加無處容身。

范國威成強敵

房署陸續就議員辦事處進行抽籤，按照慣例落選議員須將辦事處騰出供當選議員抽籤，據聞新界東嘅房署辦事處位置因而出現「大洗牌」，當中嘅輸家首推白鴿黨，因為佢哋要放棄部分經營多時嘅根據地。地區消息指，白鴿黨代主席劉慧卿除咗固守位於沙田嘅辦事處外，幸運抽中原屬建仔副主席劉江華位於將軍澳寶琳嘅辦事處，基於地理位置優越且人流較為暢旺，據聞卿姐有意將調景嶺辦事處資源轉移至將軍澳寶琳，希望進一步開拓中產雲集嘅將軍澳。

地區消息續指白鴿黨此舉可謂「有得有失」，因為無可避免須放棄黃成智經營多時嘅北區，據聞黃成智位於上水清河邨同粉嶺華明邨嘅辦事處，最終分別落入建仔陳克勤同新民主同盟范國威手中，其中後者更加係首度喺北區有落腳點，更幾乎完整覆蓋成個新東，預料未來會同白鴿黨有更多短兵相接嘅機會，係地區工作嘅強敵。

眾所周知，地區工作嘅開展最緊要有落腳點，如果冇嘅話就要打游擊戰，效果同資源都難以預料，加上白鴿黨舊年區議會大敗，實力嚴重遭掏空，黃成智能否東山再起，就要視乎佢有冇奇招或高人指點喇！