乘客歷8秒生死時速

柴灣道長命斜大車禍中，數十新巴乘客不幸坐上突然「無人駕駛」的「恐怖巴士」，眼見巴士在斜路俯衝而下，未知會撞向何處，更擔心會否翻車，一時間又沒有懂揸巴士的「英雄」出現拯救，各人只能無助地驚呼尖叫，或作出有限的自保措施，車廂內一片混亂。經歷了「最漫長」的八秒鐘生死時速後，雖然最終有不少乘客受傷，尤幸均能「執番條命」。

目擊車長暈倒的姓李新巴女乘客，事發時坐在下層近司機位，她事後憶述事件時仍驚魂未定，表示聽到車長「呀」一聲後暈倒，挨在右邊，巴士變成無人駕駛，「我嚇到企起身，大叫有冇人識揸車呀……個車長暈低咗！已經控制唔到架車嘞……但結果冇人話識揸，跟住架車一路衝落斜坡。」她指：「大約八秒後，巴士撞嘅時候我已經唔知點撞嘞，我跌低咗，見到佢（車長）流口水（吐白沫）。」

「S形咁行」乘客識驚

姓張老夫婦事發時手抱幼孫，坐在下層近落車門，「架車行到消防局附近，開始S形咁行，愈行愈快，司機側住個頭，我哋都已經覺得唔對路，知會出事，就係咁捉住扶手，先至冇咁傷咋！」

分別傷及左大腿及右膝的姓葉夫婦，事發時坐在上層中間位置，葉先生稱，當時上層大約有十幾人。巴士落斜去到消防局附近就剷咗去左邊壆，大家都覺得奇怪，諗緊發生乜嘢事，巴士車身已經開始刮路邊嘅樹，乘客都嚇到走晒去右邊。」葉續稱：「我自己坐喺地板，坐低啲貼低啲，受傷應愈輕！」他同時緊抱坐在座椅趴下的太太。「巴士衝咗一陣，愈嚟愈快，好多人尖叫，下層已經傳嚟話司機暈咗，冇幾耐，巴士已經右轉撞到九巴！」

頭部爆缸受傷的乘客沈先生稱，「我坐喺下層，撞嗰下就跌低咗，其他乘客都一仆一碌。」新巴另一名受傷女乘客受驚哭着說，當時「車入面好亂，好多乘客係咁想快啲走出去。」

而被撞的九巴，亦有不少乘客受傷及受驚，姓伍男乘客表示：「我當時見到落斜架巴士右轉撞埋我哋架巴士車頭，好危險o架，雙層巴士右轉扭軚嚟落斜，唔反車算好彩啦。」乘客黃先生稱：「當時巴士坐滿約四分三人，我坐喺上層近樓梯口睇緊報紙，一撞就跌落樓梯，腰手都傷，有個阿伯傷得仲重，穿頭流血。」站在下層的姓李乘客指，事發後「斷片」，「唔知乜事，自己就頭爆缸，腰受傷！」