中醫藥業四不像 貪曾齋噏當秘笈

嘩，你估山草藥咩，噏得就噏！

邊個咁無賴？隨便噏，當秘笈，分分鐘累街坊喎。哦，原來又係佢，曾蔭權！

咁就唔奇咯，呢位過氣特首向來以三大法寶治港，第一係吹水，第二係吹水，第三都係吹水，齋噏亂噏鬥噏狗噏確實係佢嘅過人強項。咁今次呢劑噏得就噏嘅靠害山草藥，又係邊個受害呢？係中醫藥界。

講多無謂，聽吓業界點講貪曾啦。多名來自兩岸各地嘅學者出席一個叫「五味子的過去、現在和未來」嘅研討會，結果變成聲討「小曾子的過去、現在和未來」批鬥大會，紛紛狠批貪曾七年施政純粹齋噏，一度宣稱發展中醫藥，結果得個講字，空頭支票從未兌現。

嗱，貪曾發展中醫藥係吹水唔抹嘴，業界唔似佢呀，炮轟鬥噏特首信口雌黃，全部有根有據o架。大家仲記唔記得，貪曾任內曾經承諾會考慮加設中醫院呢？又話改善中醫畢業生就業，成效呢？又話發展中醫藥，行動呢？一句講晒，全部廢噏！

最離譜嘅係，貪曾唔施予援手都算啦，仲要狠下毒手，任由部門以成效不足為由，將香港賽馬會中藥研究院解散，令業界雪上加霜。咁即係話，中醫藥喺貪曾任內唔單止無得到有力支援，反而遭到無情冷待，咁叫發展中醫藥？咁叫支援業界？咪玩啦。

叮佢個鎯鎯，貪曾有病就睇醫生啦，唔好靠害人吖嘛。本來呢，中醫藥喺香港真係大有作為o架，當年板藍根一度成為沙士救星，已經揚威國際，所以回歸之後港府揚言打造中藥港，唔係無道理嘅。只可惜好事多磨，一拖八年，貪曾上場之後唔急起直追協助業界，反而口蜜腹劍落井下石，搞到業界又白白浪費八年光陰，你話係咪靠害吖？

嗱嗱嗱，貪曾真係有病o架。中醫話久鬱成病，而貪曾就係久噏成病，長久以來施政都係一味齋噏，簡直病態！業界形容發展停滯嘅中醫藥業似四不像，其實貪曾為官劣績斑斑，不廉、不公、不才、不信，佢先至係一尊醜陋嘅官場四不像！

苦口良藥，太一叮奉勸新特首梁振英，必須以官場四不像為戒，新成立嘅中醫藥發展委員會一定要實實幹幹，做啲成績出嚟，唔可以齋噏，叮！