政壇：政商定格：陳鄭玉而倡揀傳統熨斗
做熨斗起家嘅仁愛堂副主席、東保集團創辦人兼行政總裁Connie陳鄭玉而，尋日同另一位副主席李愛平入馬場，為仁愛堂前主席蔡黃玲玲及丈夫蔡金山嘅愛駒「智高星」打氣。
問起點揀熨斗時，Connie話依家啲熨斗宣傳講到天花龍鳳，其實最終都係傳統嘅蒸氣電熨斗最好，唔一定要買好貴，蒸氣量大就夠喇。佢明年將接任仁愛堂主席，佢話依家已忙住同現屆主席黃達東溝通，為接棒做好準備，至於盤生意，佢笑言有老公陳鑑光睇住，非常放心。
轉頭又遇到九龍表行第三代傳人Kevin黃家恒同女友高潔拍住拖入馬場，Kevin話近日忙於籌備表行周年活動，忙到依家至有假放。佢透露伯父黃錦成明年初將會出書，做埋記者走訪各行各業嘅精英，講吓佢哋嘅生意經。
蔡黃玲玲（右）有愛駒出賽，陳鄭玉而（中）同李愛平都入場支持。