政壇：搞搞政：蘇錦樑掂親電視台都阻滯

反對派最近開始將槍頭轉向商務及經濟發展局局長蘇錦樑，包括批評佢唔肯介入香港數碼廣播電台風波、翻炒佢嘅寓所僭建事件，以至炮轟佢遲遲唔肯批出更多免費電視牌照等，但唯一煲得起嘅只有免費電視發牌問題，事關亞洲電視場「世紀爛騷」愈煲愈熱。

由於有泛民議員抽中喺本月二十八日嘅立法會大會上，就亞視「爛騷」同免費電視發牌問題提出動議，本來蘇錦樑喺月底出訪法國，出席一推廣香港紅酒業嘅活動，並順道向當地商界推介來港投資，但今次係新一屆立會首項針對商務局嘅議案，為免被議員質疑佢唔尊重議會，惟有放棄外訪。

查實佢每次碰到有關電視台嘅問題都遇到波折同阻滯，例如上次處理倫敦奧運轉播權風波，最後佢搵咗幾間電視台嘅高層秘密談判，仲講到明要喺當晚九點四十五分之前傾掂數，否則就會宣布談判破裂。

點解要訂九點四十五分做死線呢？原來佢晨早請晒假訂好機票，喺當晚坐夜機趕往英國出席愛女嘅婚禮。最後佢呢招果然奏效，令全港市民都可以免費睇奧運，佢亦趕得切上機見證女兒嘅人生大事，兩全其美，唔知今次免費電視發牌風波，能否同樣有個圓滿結局呢？