政壇：俞宗怡榮休宴群官拱照
公務員事務局前局長D姐俞宗怡退休，政務官協會幫佢搞餞別宴，擺咗十九圍咁多，聽聞係回歸後第二大嘅政府高官歡送晚宴，足證D姐喺官場深得人心。
當晚有份出席嘅現任、前任官員粒粒皆星，有政務司司長林鄭月娥同商務及經濟發展局常秘黃灝玄等，已離開官場嘅有鄭汝樺、「AO酒聖」蔡瑩璧同前工務司詹伯樂都畀面出席，可以話雲集幾代精英高官。當晚仲秉承政務官傳統，無論係D姐致詞抑或係其他嘉賓演講，甚至係「AO歌王」楊立門獻唱，都一律全英語。
對英語水平要求極高嘅行政會議成員葉劉淑儀都大讚D姐英文一流，絕對係官場典範，仲叫啲後生AO好好學習。高官在位時被擦鞋，一啲都唔出奇，但D姐已係退休高官，都咁受愛戴，證明佢人緣真係好到冇人有。