政壇：嫻姐打坐忘情

新一屆立法會「開學」後第一槍，就係長者生活津貼，但泛民主派係咁拉布，都唔知幾時先過得到。好似工聯會嘅議員陳婉嫻咁，講親長津都扯晒火，堅持要撤銷資產審查。咁搞法，好傷身亦傷心喎！好彩佢有方法平衡心態啫！

就長津撥款，財委會上星期五至拉布拉咗幾粒鐘，嫻姐就話佢喺開會期間，有時都會趁休息偷偷上十樓寫字樓練氣功。佢話練氣功站立，雙手扮捧碗，最緊要係乜都唔諗，同埋最忌心浮氣躁，咁即係連長津都唔諗，擺埋一邊先。佢話每次練氣功十至十五分鐘，仲話練完後無論原本心情幾差都可以笑番，咁就可以唔再以黑面示人。

身手勝李卓人

眾所周知，幾年前嫻姐因患乳癌做過手術後，一直都保持做運動嘅習慣，最鍾意係行山，亦有搵私人教練教佢健身，依家練埋氣功，唔知係咪會心平氣和啲呢？大家都見到佢尋日就算講到長津撥款，都冇咁扯火喇。

話說嫻姐尋日出席一個活動時，同工黨議員李卓人一齊玩呼拉圈，事前雙方仲交換呼拉圈。為乜咁做？嫻姐話咁係叫做政治交差，意即雖然大家嘅政見唔同，但都可以有偈傾嘅。

咪睇阿人身形大隻，點知推呼拉圈推到雞手鴨腳咁，成日推跌個呼拉圈，最後做咗包尾大幡添！反觀嫻姐推得有板有眼，跑嚟跑去都唔覺喘氣，活力十足，起碼跑贏阿人先啦！