規劃失當累街坊 街童隨時淪黑幫

黑勢力肆虐東涌，青少年淪為「陀地」，繼天水圍之後香港隨時又多個「悲情城市」，問你怕未！

有關注團體喺東涌做咗個調查，了解區內組群情況，結果發現超過三成受訪青少年有黑社會背景，而且曾經作奸犯科，包括恐嚇他人、使用武力同塗鴉等等。真係唔講唔知道，一講嚇一跳，新市鎮紛紛淪為黑幫地盤，唔驚就假！

關注團體話，童黨問題同區內缺乏家庭服務及支援網絡、社區設施及就業配套不足有關。其實係人都知，由於唔少新市鎮規劃失當，文娛康樂設施嚴重不足，青少年無所事事，除咗周圍閒逛就係四處搞事，街童變童黨，最後跟埋「大佬」食大茶飯，一啲都唔出奇。

喺呢類相對封閉嘅新市鎮，黑勢力一旦成氣候，成為罪惡溫床，後果可大可小。好似天水圍咁，居民愈來愈多，但社區設施同服務配套跟唔上，居民孤立無援，家庭糾紛甚至倫常慘劇無日無之，黑社會及童黨犯罪問題更長期困擾居民，淪為惡名遠播嘅「悲情城市」。

弊在當局冇吸取教訓，社區規劃閉門造車，留下後患無窮。嗱，將軍澳就係另一個例子嘞。區內四通八達嘅天橋網絡為市民帶來方便，但亦暗藏危機，由於康體設施不足，唔少天橋變成街頭青少年聚眾鬧事、糾黨行劫嘅「天堂」。早排有調查發現，近一半受訪者認為區內童黨和黑社會問題嚴重，尤其係「夜青」問題，更加成為罪惡根源。

更弊嘅係，將軍澳人口激增，童黨猖獗，但區內警力長期不足，打擊犯罪行動仲要向其他環頭「借兵」，你話係咪搞笑吖。

講到規劃失當，社區設施不足，又點只東涌同天水圍吖。好似葵青區咁，人口已經突破五十萬，原有康體娛樂設施早就供不應求，但簡單到好似興建新體育館咁，拖足十二年都未落實，市民望天打卦事小，青少年學壞事大吖。

所以話，新市鎮淪為黑幫招兵買馬嘅新地盤，青少年未大先黑，未大先壞，政府規劃失當，官僚闊佬懶理，根本就係靠害。咪話太一叮唔提醒，小時了了，大未必佳，當局唔保護青少年，即係毀咗下一代，毀咗香港嘅未來吖，叮！