貪曾若升呢 政協必沉淪

嘩，眾怒難犯，連建制派都話「七一」要上街抗議，香港想唔亂都幾難咯！

乜嘢事搞到咁勞氣？嗱，大家聽咗之後唔好激到爆血管呀，據聞「香港第一貪」煲呔曾爵士可能升呢出任全國政協副主席喎，你話奇唔奇吖！

大家係咪唔敢相信呢？係吖，係幾匪夷所思o架。貪曾施政無能，私德有虧，當權七年搞到香港烏煙瘴氣，民怨滔天，試問何德何能升上神枱呀？何德何能加官進爵呀？貪曾貪遍省港澳，歎盡海陸空，醜聞纏身，身敗名裂，咁嘅人唔叫廉署請佢飲咖啡，反而請佢坐上國家領導人位置，係咪黑白顛倒吖？係咪天理難容吖？

所以咯喎，建制派就算平日幾河蟹都好，今次都忍唔住發炮。有人不點名指港人未必歡迎貪曾出任政協副主席，有人表明對退任特首奉旨加官進爵好有保留，有人甚至私下指如果中央不理香港民意委任貪曾，唔排除明年七一首度上街表達強烈不滿咁話。

唉，貪曾啊貪曾，人貴有自知之明，唔該你自己照吓塊鏡，你何德何能吖？既然已經落台，咪自動消失囉，何必搞到天怒人怨呢。唔通你嘅無間道任務仲未完成，一定要搞到香港永無寧日至安樂！

所謂空穴來風，未必無因，貪曾可能廁身政協，諗落唔係無緣無故o架。試諗吓，政協出名藏污納垢，龍蛇混雜，貪賄黑毒，呃騙霸姦，乜人都有，樣樣都齊，如果加埋臭名遠播、貪婪腐敗嘅貪曾，咁咪牛鬼蛇神共冶一爐囉。話時話，以貪腐政績論英雄，貪曾躋身政協，實至名歸啦，叮！

咁講啦，新一屆領導人新鮮出爐，應該勵精圖治，順應民情，如果唔想政協呢個國家名器臭上加臭，唔想香港政局亂上加亂，千祈唔好捉貪曾呢隻大老鼠入米缸呀，否則盞唔衰攞嚟衰嘅咋！

唔係咩？北大人聲稱要防範及遏制外部勢力干預港澳事務，貪曾爵士有個外號叫無間道，畀佢躋身政協，整臭個朵事小，引賊入屋事大吖。港人要共享做中國人嘅尊嚴同榮耀，但貪曾孭住貪腐臭名，有個咁嘅所謂國家領導人，港人點會有尊嚴同榮耀呀！

貪曾若升呢，政協必沉淪。北大人聽唔到港人心聲，都應該聽到自己親生仔女建制派嘅諫言，唔好敵友不分，搞到眾叛親離，再次出現幾十萬人上街嘅場面呀，叮！