SUN世代：想多一步闖出康莊路

作為時裝企業主管，由開設分店至新一季營銷策略，都是Edward職責範圍。原本他是一名會計師，八年前加入公司後，一直負責財務管理，與零售範疇拉上關係，全因在工作上「比其他人想多一步」，令他受到賞識，擴展事業路。

大學剛畢業時，Edward已與零售服務業結下緣分，他憶述：「九七年畢業，咁啱金融風暴，搵咗幾個月都搵唔到會計嘅工，最後喺一間鞋店做兼職售貨員。」眼見不少同學都陸續找到理想工作，儘管心中不是味兒，但他沒有氣餒：「當時只係諗一封求職信搵唔到，我就寄一百封，幾個月後終於畀我搵到會計工作。」

十多年來，Edward都擔任會計工作，他卻笑言自己是非一般會計師：「我唔只係幫客戶計算帳面賺蝕，我仲會諗點樣幫客戶賺到更多。」因此，面對外圍經濟不景氣，他仍信心十足，帶領公司攻佔內地市場。