SUN微博：打橫嚟講：甩漏政策又出台

香港政府話「為遏止樓價」，而推出增收額外印花稅兩大「辣招」，成效點呢？

果真，樓市交投實是少咗，但樓價仍係有升無跌。當然啦！家陣有錢買樓嘅，甚少係本地用家，尤其是豪宅貴價樓，全是大陸投機客，佢哋啲熱錢（或黑錢），多到一定要搵出路，不能存於一處不安全，隨時會一Q清袋的地域上。

所以，即使香港政府調高非香港人買樓，要多付15%額外印花稅，對他們而言，怎會係問題！甚至，轉個頭，當呢個「臨時措施」失敗，或消化後，樓價再度上揚，就乜都返嚟啦！

香港政府每次推出政策，總不能深思熟慮，計劃周詳後至見人，係要甩甩漏漏，畀行內媽叉，才面懵懵的補飛話：「仲可以有完善的空間。」然後，又修修補補的，叫人硬接受。

前日，香港政府將「辣招」方案，交上立法會審議，就畀議員們狂插餐飽嘞！最奇奇怪怪的一項，係本地人以「公司名義」買樓，都要交15%買家印花稅。好啦！如果我單拖唔夠錢買樓，搵多一兩人夾份，為公道安全起見，合組公司去買，咁都跌入稅網度。如斯未想清想楚，有漏洞的政策，點出得嚟見人呀？

另外，呢兩自認不凡的辣招，只壓制到無錢入市嘅香港窮人，而非有錢佬，咁做，將會激化貧富更懸殊；有錢的，不怕入貨，長線有作為；無錢的，追不及通脹，只會愈來愈買不到樓，矛盾同怨憤定會日漸加深，點算！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot