政壇：政商定格：湊大《選擇》劉燕卿榮休
消委會總幹事Connie劉燕卿今日正式退休。佢尋日最後一次主持消委會《選擇》記者會，佢由《選擇》一九七四年創刊做到依家已經三十八年，可以話係睇住《選擇》成長，感情自然深厚。話說喺記者會後，消委會副主席何沛謙好鬼馬咁話有驚喜，Connie就好開心咁爆出一句：「係咪有雙糧呀？」點知原來係一盆花，但Connie都好感動，但最感動嘅都係收到個Goodbye cake，上面仲刻有《選擇》的朱古力牌仔添！佢最後臨別話當年，特別多謝傳媒風雨不改出席每月舉行嘅記者會，亦令《選擇》成為搶手雜誌之一。
消委會尋日特別向劉燕卿（中）送上歡送蛋糕，令佢開心到瞪大眼。