政壇：乖女幫手葉劉唔愁冇人

先係陳岳鵬，再嚟施俊輝，新民黨已成為直通官場嘅白金升降機，個個名牌大學後生仔入黨幾年後就走佬搵真銀，令佢哋有個「高官青訓營」嘅外號。但黨主席葉劉淑儀經歷過兩次經驗後，仍然對名牌大學生情有獨鍾，最近一次過請五位助理，一律都係嚟自名牌大學，唔通佢真係唔驚再被撬人才？

呢五位後生仔，履歷都非常勁，有人讀劍橋大學主攻東亞研究，有人讀康奈爾大學修讀政策研究，最普通一位已經係港大哲學及藝術雙主修，可以話粒粒皆星。葉劉話唔諗住綁住佢哋，所以都係簽兩年合約，鍾意走就走，鍾意去政府就去政府，當係幫政府培訓人才喎！

把口就話冇所謂，其實葉劉都好勞氣，最近四周同人呻，點解有後生仔會當新民黨係踏腳石，冇乜責任感呢？好在葉劉嘅囡囡葉榮欣就唔諗住做叛徒，講明兩年後就算返美國史丹福大學讀書，讀完都會繼續幫媽咪手，唔會出去幫外人都唔幫自己人。