官商勾結似黑箱 私家醫院多亂象

官官相衞大家都知點解，醫醫相衞又係講緊乜？大家如果唔知，快快攞最新一份審計署報告睇吓，就知道點解喇。

審計署衡工量值報告踢爆，衞生署對私家醫院嘅監管近乎零，揭發問題多不勝數，簡直就係一本醫醫相衞實例大全，令人嘆為觀止。嗱，等太一叮揀幾個例子畀大家開吓眼界啦。

醫醫相衞一，巡查得個樣。衞生署無妥善備存巡查紀錄已經夠晒離譜，就算發現嚴重違規，一樣隻眼開、隻眼閉，甚少發出勸喻或警告信。咁搞法，私家醫院唔亂象叢生就有鬼啦！

醫醫相衞二，監察醫療事故放軟手腳。唔使講咁多，睇兩個數字就夠嘞，○八年至一一年間，私院嚴重醫療事故嘅延遲通報個案多達五十五宗，而衞生署居然只係發出三封規管信，你話佢哋係懶吖，定係詐傻扮懵？

醫醫相衞三，醫院收費欠缺透明度。講到呢樣，相信大家未試過都聽過喇，私家醫院收費高不可攀，莫講普通市民負擔唔起，就算略有家底嘅人都未必頂得住，一場大病隨時傾家蕩產吖。

唉，其他例子唔再數嘞，費事聽到大家爆血管。衞生署做嘢求求其其，是是但但，都唔知究竟係監管，定係包庇！

講到衞生署包庇私院，就唔可以唔提呢一樣咯：胡亂批地，不監不管！唔係咩？香港最值錢嘅就係土地，當局向私院批地之後就關人個關，不聞不問，醫院有無提供足夠低廉床位唔理，醫院賺到嘅錢點用唔問，咁同白白畀塊地醫院牟利有乜分別呀？

仲有吖，賣地畀私院一樣慷納稅人之慨。最離譜一單係，有間私院將原本興建醫院嘅一半土地攞嚟起住宅，而當局居然照批准，咁何止係醫醫相衞，直頭係官商勾結啦，叮！

唔怪得「第一貪官」煲呔曾咁落力推銷醫療產業啦，睇怕佢居心不良，另有所圖。嗱，按貪曾一手策劃嘅醫療產業大計，港府預留咗四幅土地用來興建私院，容乜易又搞出官商勾結、利益輸送醜聞o架？

咪嘞，當局成日話無地起屋，四幅土地與其益咗私院，不如改變用途，攞嚟拍賣建私人住宅又好，或者建公屋及居屋又好，無謂搞到下次踢爆醫醫相衞、官商勾結醜聞嘅唔係審計署，而係廉政公署吖，叮！