SUN微博：打橫嚟講：蘋果侵權真白癡

為了錢，幾醜陋的事都會發生，都有人敢做。兄弟鬩牆爭家產、幕後老闆台前跳騎呢舞為阻人發牌、豪宅僭建想霸多幾呎地、呃人打毒針賺整容費……做盡埋沒良心之劣行，也不自省。

個人貪念，沖昏腦袋，仲有得講吖！一間自詡大機構，竟不顧身世、不理形象，做啲低三下四的手段，實在不能原諒！

打破香港電影票房紀錄的《那些年，我們一起追的女孩》嘅導演兼著名台灣作家九把刀，千里迢迢親自跑來香港，踩上門到蘋果公司（Apple Inc.）香港總部「上訪」，因未得佢授權同意下，蘋果的應用商店（App. Store）提供「九把刀全集」電子書，供人收費及免費下載，做法侵犯其版權。而九把刀過去兩年已多次去信蘋果投訴，要求將盜版小說「下架」，佢甚至願意提供自製的「正版」，商談合作，皆不得要領，才老遠走嚟當面交涉；點知仲畀蘋果職員罵他「白癡」，兼不讓佢離開，搞到報警收場。

作為一間大機構，係應有企業良知和道德或責任，要守法和「持份者」合作，尤其可幫到公司發展的人。有正版優質原裝靚稿，飯應的擸住先啦！係要搞到個「朵」臭晒先至安樂！如那個不是大名鼎鼎的人物，仲畀人蝦死囉！

作為推銷創意的平台，竟不尊重版權，不支持原創作品，也不愛惜人才，只求短視賺啲污糟錢，還是一個大企業嗎？請「拿臨」刪除違法盜版及賠償受害者，醒啲啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

email：sunweibo@opg.com.hk

「就係咁爆」網址：tv.on.cc/hot