政壇：搞搞政：黃碧雲投錯票仲死撐

白鴿黨嘅新丁議員黃碧雲上星期五喺立法會投票時，按錯掣、投錯票，否決咗有關提早喺立法會討論行政會議成員林奮強賣樓事件。開會一舊雲，但黃碧雲卻指可能係機器出錯，尋日佢更話今次事件可以揭露投票制度有改善地方，對立法會嚟講都算好事。錯都拗番正，難為佢面皮夠厚。

尊貴議員唔識撳掣，立法會就專登整個「按掣班」畀議員補課，黃碧雲話，呢個「按掣班」唔係專為佢而設，仲話：「按掣阿茂都識」，今日個班只係為咗測試投票系統可唔可以負荷到全體議員。佢又話，到依家都唔知當日投票自己係啱定錯，因為當時投咗咩票，真係無乜印象，仲話當時太刺激，唔記得發生咩事呀。講到尾係佢一舊雲，同系統有乜關係呢﹖咁大懵，佢到底係咪真係有望做白鴿一姐o架﹖佢尋日好晦氣咁答，話自己連立法會都未熟悉，學咩人做主席喎，現時唔諗選主席呢啲嘢住。睇嚟佢都有自知之明！