政壇：鍾樹根揼本包裝贏議席
競爭靠包裝，立法會選舉落幕之後，議員嘅開支申報便備受關注，其中最令人心思思嘅就係到底啲議員用咗幾多錢入主立會，當選之後，先後搞出印錯卡片、講錯成語，甚至錯誤論政嘅建仔鍾樹根，競選開支中就有十八萬元係選舉策略顧問服務，另外仲畀多四萬蚊專為應付選舉論壇補課，從暫時公布咗開支嘅議員嚟睇，佢畀嘅公關費算係偏高嘅。
樹根過去被指形象「老土」，今次花錢升呢、最終成功奪得議席，算係投資有回報。不過，唔好以為新人先要狂掟包裝費，當選超級議員嘅民協馮檢基同工聯會陳婉嫻一樣投資咗十六萬同十萬元作選舉或傳媒顧問費。
最弊嘅仲有投資咗但冇議席嘅人，譬如報名參選一日後即極速退選嘅骨科醫生潘德鄰，原來佢早喺四月份已部署參選，喺六月底向公關公司繳付咗一個月約十四萬元嘅費用。