政壇：張炳良巡元朗親吻大地
運輸及房屋局局長張炳良上個禮拜落區去元朗，竟然鬧出工傷事件，事緣上星期四，張炳良同班官員靜雞雞去元朗視察中轉房屋，點知行行下失平衡，仆咗去石屎地行人路，情急下惟有用手撐住，就係咁搞到成隻左手手掌損晒，要即時入醫院治療，仲要打埋破傷風針，醫生話最快要兩星期至好番。
落區搞到親吻大地，張炳良都可算唔好彩。佢尋日現身時，左手仲被層層紗布包裹，佢話今次因為唔小心而「趴街」，下次會小心啲，雖然受咗傷，但張炳良好樂觀，話好彩係傷左手，如果係整親右手，都唔知點食飯，分分鐘要食殘廢餐添。為咗記者明白佢點解仆親，佢仲即時嚟次案件重演，幽默感十足，希望佢早啲康復喇。
張炳良落區受傷，左手損咗要打破傷風針。