政壇：鍾國斌環保衫救地球

時裝係都市人最重視嘅生活必需品之一，近年時裝業悄悄起革命，但香港卻唔係好跟得上。身兼織造廠董事嘅立法會紡織及製衣界代表鍾國斌（Felix）尋日就話，本港業界同消費者對環保時裝都唔係好受落，講到着得環保，Felix就批評依家有唔少大型時裝品牌鍾意設計啲即棄平價時裝，博啲衫着幾次就爛，等消費者多買，佢哋多啲生意，呢種手法雖然可以畀消費者換多啲款，但對地球資源就損耗大囉！

歐洲模式港未接受

Felix話，呢種銷售模式叫做disposable fashion（一次性時裝），不過，佢明顯對呢種經營模式睇唔過眼，佢話，啲消費者雖然買完又買、非常開心，但啲衫好快變廢物，對地球資源消耗好大。其實，一件質地好、設計佳嘅衫可以着好耐，時裝搞到好似即棄飯盒咁，真係唔符合環保大潮流噃。

所以，呢種唔環保嘅趨勢都遇到對手，歐洲現時就流行一種環保時裝，主要將一啲人哋唔要嘅舊衫重新設計，符合環保同慳錢嘅大原則，不過，Felix認為呢種模式喺香港仍然未成氣候，希望遲啲等多啲香港人接受呢種環保風之後，佢都會鼓勵旗下設計師採用多啲呢種設計。

講完環保時裝之後，今年市道又點呢？市面唔少大型時裝店已經提早減價促銷，經營出入口生意嘅Felix就話，佢除咗睇好今年聖誕零售市場之外，仲拍心口話明年出口會有一定程度增長，似乎佢眼中嘅經營環境並唔差。