旅業照舊無王管 阿珍自有後來人

走咗一個阿珍，仲有無數個阿珍。阿珍係乜水？咪就係嗰個喪鬧內地遊客，以「這輩子不還，下輩子也要還」金句聞名全國嘅港產惡導遊囉。

呢，一個來自內地嘅四日港澳旅行團，尋日完成最後一日香港行程，下一站係「過大海」去澳門，男導遊把握最後機會推銷一百蚊一個嘅洋紫荊花瓶，點知冇乜人吼，導遊大發晦氣，竟然亂踢行李，又將團友早餐掉落地，甚至報警聲稱被團友推跌喎。

事實又係點呢？警員到場翻看閉路電視，證實係導遊自己仆倒，與人無尤。不過咁，團友雖然討回清白，但明言對香港旅遊大失所望，見過鬼怕黑，以後未必再嚟咁話。

今時今日，咁嘅服務態度點得o架。香港假假哋都係國際大都會，咁樣待客，乜鬼形象都丟晒啦。香港《導遊作業守則》講到明，導遊必須遵守職業道德，不得以任何形式強迫或誤導旅客購物，呢位惡導遊硬銷商品已經唔啱，對團友發晦氣係錯上加錯，最後仲要惡人先告狀，報警老屈團友，更加係匪夷所思。當年阿珍雖然惡頂，但動口不動手，呢位男版阿珍一鬧二踢三老屈，直頭係青出於藍喇。

話時話，香港旅遊業烏煙瘴氣，欺客醜聞層出不窮，唔通無王管咩？有就有嘅，不過形同虛設啫，官方嘅旅遊事務署，半官方嘅旅遊發展局，仲有業界嘅旅遊業議會，都係擺設咋，尤其係旅遊業議會，話就話係自律機構，其實自己人管自己人，根本就係嘥氣。當年阿珍事件引起廣泛關注，香港旅遊業臭名遠播，當局為咗補鑊，裝模作樣進行檢討，仲提出唔少建議添，其中一個建議係成立法定機構「旅遊業監管局」，統一規管旅遊業。但唔知點解，到今時今日都未有下文，可能係不提起就表示不存在啩。

旅業亂成咁，導遊惡成咁，主管嘅商務及經濟發展局要負起最大責任。局長蘇錦樑話喎，旅遊業係香港經濟四大支柱之一，政府非常重視旅遊業嘅發展，會喺不斷改變嘅環境中完善監管架構。嗱嗱嗱，講多無謂，食多會滯，唔該蘇局長坐言起行，盡快落實監管措施，否則再咁拖落去，睇怕等唔到下輩子還，旅遊業呢碌柱好快就會折斷嘅喇，叮！