SUN微博：SUN畸事：肥彭等瀨撻
BBC風波，搞到出任信託主席嘅肥彭一身蟻，最離譜嘅係個總裁撈咗五十四日，肥彭都畀佢拎成千六萬離職酬金走，實在有貪曾益自己友嘅影子。今日，兩位久違嘅無能之人再次相逢，真係欲哭無淚……
貪曾︰舊老細，呢鋪做咩咁失策呀？
肥彭︰你識咩，就算我係明益人又如何，老頂撐我，驚咩？
貪曾︰我都唔差，身邊仲有班「曾朋友」挺我！
肥彭︰傻嘅咩！你淨係識頒勳章畀人，依家佢哋就嚟畀人「搣柴」喇！
貪曾︰好彩，我啲鮑魚仲有存貨，可以用嚟同佢哋維繫吓感情……
肥彭︰你啲鮑魚擺咁耐，發晒霉喇，「黑鮑」搵鬼食咩？
貪曾︰唔使驚，我知你實食。
肥彭︰點解？我淨係鍾意食蛋撻。
貪曾︰我一早「升呢」，學足你咁奢華，屋企都收埋唔少鮑魚撻o架，你可以慢慢瀨。
肥彭︰咁我等住「瀨撻」喇。
貪影不離