政壇：搞搞政：建仔北上訪統戰部謝票

喺九月立法會選舉大勝嘅建仔，領導層將率領旗下一眾立會議員，相信包括黨主席譚耀宗在內，會喺聖誕節後即十二月二十八日至三十日去廣東省交流探訪。據講佢哋會喺廣州市留一陣之後，就會兵分兩路，一隊往東莞、惠州方向出發，另一隊就去潮汕探訪，務求三日之內行勻成個廣東省，拜訪到幾多得幾多。

消息人士話交流團有兩個重要目的，其一係加強建仔同廣東省政府各部門嘅聯絡同溝通，其二就係拜訪當地統戰部，據聞呢個隱性行程先係行程嘅重中之重。有消息人士透露，去得統戰部，梗係去多謝相關單位喺選舉期間大力聯繫香港各同鄉會拉票啦！

香港有各大小同鄉會，平日負責聯繫鄉親，有事時就出手相助。喺選舉期間，同鄉會亦發揮意想不到嘅功用，但若然冇統戰部首肯，佢哋絕對唔會胡亂支持任何候選人，咪以為建仔代表建制派就奉旨有票，更加唔好當咗啲票係自己呀，如果得唔到相關單位祝福，真係想贏都難喇。