政壇:高官發功搞香港設計年

點證明香港唔再係文化沙漠呢?香港設計中心行政總裁Edmund利德裕同創意香港總監Jerry廖永亮,就齊心搞旺「2012香港設計年」。 Edmund近月走訪曼谷、北京、上海同新加坡,原來各地紛紛搞大型藝術展覽同論壇,推動創意氣氛熱烈。香港都唔輸蝕,踏入十一月後分別有創意生態展、亞洲色彩展、設計營商周等。嚟緊十一月底將舉行「巴士設計遊」,可以安排市民免費去睇晒有關展覽,行程約半日。

查實唔少高官已背後發功,Jerry就爆料話商務及經濟發展局局長蘇錦樑早前隨貿易發展局出席杭州招商活動時,遇見一班年輕設計師,大家傾足個幾鐘。傾乜咁開心?之唔係講吓香港未來設計界發展藍圖囉。有政府牽頭支援,香江又人才濟濟,夠晒條件搞旺創意經濟喇!

第一手消息請下載on.cc東方互動iPhone/iPad/Android/Windows Phone Apps

利德裕(左一)、廖永亮(右二)、設計中心項目顧問陳惠明(右一)同珠寶設計師羅啟妍(左二),齊心搞好香港設計年。