政壇：太座下禁令象哥無蟹食
立法會進出口界議員「象哥」黃定光尋日又以大閘蟹會友。以往大閘蟹價格年年上升，但象哥話今年蟹價冇貴到，因為幾個蟹湖不但大豐收，仲出產唔少巨型蟹。
點解大豐收？象哥話太湖、陽澄湖同洪澤湖等幾個蟹湖，今年都冇乜大型潮漲潮退，令啲蟹仔唔會畀急流沖走，可以安然成長，估唔到湖嘅「和諧」咁緊要。象哥已去到「蟹神」級數，就咁拎隻蟹上手已估到公定乸，但今年蟹季佢只係食過一隻蟹就要鳴金收兵，因為佢太座林淑儀落咗柯打，唔准佢食咁多，皆因膽固醇太勁。
雖然象嫂尋日冇現場監督，象哥都好聽話，眼見大家不停拆蟹都冇心郁，只係叫大家食多啲。
