政壇:CY禮賓府「復耕」

特首CY梁振英一向熱愛耕種,但自宣布參加特首選舉後,佢嗰幅位於山頂大宅嘅耕地就開始荒蕪,佢接受訪問時話,見住田園已蕪,內心都有啲戚戚然。佢上任後不斷畀別有用心人士聯同反對派立法會議員刁難,更加冇時間理塊耕地啦。不過近日有消息話佢已開始喺新遷入嘅禮賓府裏面「復耕」。

CY種過嘅農作物多不勝數,除咗花卉外,蔬菜亦唔少據講佢喺禮賓府種咗四種農作物,包括粟米、油麥菜、菜心同蘿蔔。眾所周知,佢對耕作好有心得,以往仲經常將種植成果送贈朋友,好多收到蔬菜嘅人,食過都豎起拇指讚好!唔知佢邊啲朋友又有口福呢?

除復耕外,佢未來亦會增加開放禮賓府,招呼各界人士參觀。好似下月聖誕節,佢就預備開放禮賓府畀一班來自基層家庭嘅小朋友,為數有成幾十人,成班齊集禮賓府慶祝聖誕,期間仲會為府內嘅聖誕樹亮燈添。據聞佢已落咗指令,若然問責班子有需要招呼來訪貴賓,隨時可以出聲借用禮賓府設宴添!

校慶三度「偷食」

講開又講,尋日CY百忙中都抽空出席母校理工大學七十五周年校慶酒會,同一眾嘉賓為七百五十厘米長嘅蛋糕主持切餅儀式。話說率先上台嘅CY喺等待一眾嘉賓期間,一直望住蛋糕圍邊嘅士多啤梨,最終忍唔住取出一粒放入口,仲吮埋手指啲忌廉,然後露出童真嘅笑容。我哋發現佢前後總共偷食咗三次,莫非佢未食飯太肚餓?

第一手消息請下載on.cc東方互動iPhone/iPad/Android/Windows Phone Apps

設計圖片

梁振英出席理大校慶酒會時,忍唔住偷食蛋糕上嘅士多啤梨。