官僚眼高手低　就業導航迷途

眼高手低從來係港產官僚嘅施政特色，好似勞工處嘅「就業導航試驗計劃」，就係一次完美示範嘞。

話說港府要解決「有工無人做、有人無工做」嘅錯配問題喎，於是喺一○年推出呢套搵工攞獎金嘅催谷就業奇招，以五千元銀彈攻勢利誘失業人士應徵「無人吼」工種，當時仲預計兩年試驗期內會有二萬二千人受惠添。

試驗期下月屆滿，結果點呢？搞鬼咯，截至九月底，參加人數為七千五百人，當中成功獲聘嘅只得四千九百人，即係預期目標兩成多啲啲。至於攞到鼓勵金嘅個案就僅有一千七百宗咁大把，你話係咪得啖笑？

港產官僚眼高手低，講就天下無敵，做就有心無力，睇嚟最急需工作導航嘅人就係佢哋。正如勞工界話齋，導航計劃關卡重重，又要全職工作，又要指定空缺，最離譜係規定月薪唔可以多過七千三百元，家陣做份保安都唔止啦，計劃點會唔拍烏蠅吖？點會唔失敗吖？就業導航喎，計劃設計本身就行錯方向，又點幫失業人士重返就業之路呢？

講到官僚施政眼高手低，太一叮諗起另一個盲舂舂、四圍舂嘅措施「鼓勵就業交通津貼計劃」。又係話幫打工仔，又係申請門檻太高，結果又係令人望而卻步，最初預計有四十三萬人合資格，二十二萬人會申請，點知實施頭四個月只有二萬五千人叩門，唔夠二萬人獲批，人數比預期少咗九成！

由此可見，眼高手低閉門造車已經成為港產官僚嘅通病，香港由班咁嘅人導航，點到你唔驚？不過無計啦，計錯數比比皆是，譬如財政預算案吖，年年預算，年年失算，相差幾百億算係「精準」，最經典試過預算同修訂數字相差近一千億元。相比之下，就業導航同交津計劃嘅參與人數比預測落差九成，都唔算得乜吖，叮！

弊弊弊，講到呢度，太一叮又諗起一個到家陣依然流離浪蕩嘅迷途措施，就係「長者生活津貼」。當局次次眼高手低，鋪鋪數據老作，計劃聲稱有四十萬名老人受惠，會唔會到頭來又係只得少數人獲批o架？當局聲稱撤銷資產審查會令財政無法負擔，會唔會又係作嘢嚇人？咪話太一叮以君子之心度小人之腹呀，鬼叫當局餐餐唔係估錯數，就係報大數咩，市民唔信政府係有原因嘅。

咁啦，大海航行靠舵手，特首梁振英真係要(目及)實班官僚，施政預測成效就算有出入，都唔可以相差十萬八千里咁離譜，叮！