政壇：政商定格：李少傑珍藏普洱賀舖慶

「福茗堂」茶莊創辦人Thomas李少傑珍藏咗一批價值數百萬嘅「宋聘號」茶餅。為慶祝寶號二十五歲生日，佢早前割愛拎出每個售近五萬元的普洱茶餅，公諸同好。

代理多個時尚品牌嘅Thomas，八十年代偶然去台灣公幹品茶，一試傾心，回港後租下中環太子大廈開舖賣茶葉，可惜品茶風氣未成氣候，守至○四年先開始賺錢。

品茶二十多年，茶款花多眼亂，Thomas最愛還是鐵觀音，皆因第一位品茶老師，正是教他品嘗帶蘭花幽香、茶味醇厚的鐵觀音。但佢慨嘆傳統嘅鐵觀音製法幾近失傳，一茶難求。所以佢要自己嘅茶師埋首鑽研七年，望研發出自家製的「傳統鐵觀音」。講到收藏，佢嘅「寶物」唔少，包括茶中極品「宋聘號」茶餅，佢十年前買，每餅先三千元，依家已炒到逾三十萬元；佢珍藏咗十個，笑言多多錢都唔賣。不過遇上牛一之喜，佢都會拎出陳年普洱，同傳媒好友及知音人齊歎茶。