政壇：搞搞政：陳肇始多手差啲中地雷

上任唔夠兩個禮拜已頻頻出動嘅食物及衞生局副局長Sophia陳肇始，尋日佢就貢獻出玉臂示範打流感針。可能樣樣嘢對佢嚟講都好新鮮，前晚佢仲企圖郁手搞證物添呀！

前日凌晨，喺警方同酒牌局嘅安排下，Sophia拍住局長高永文一齊出動巡查尖沙咀同中區酒吧，睇吓有冇治安、環境衞生等問題。當佢哋去到油麻地金龍大廈一間樓上酒吧，警方喺裏面檢獲一批俗稱K仔嘅氯胺酮。唔知係咪好少見毒品，斯文大方嘅Sophia竟然做出令人嘩然嘅舉動，就係伸手去掂放喺枱面上白色嘅K仔。

Sophia咁做即時嚇窒在場所有人，有警察即時大喝一聲：「唔好掂呀！呢啲係證物嚟o架！」嘩！差啲踩地雷，佢即時縮手尷尬苦笑，見慣世面嘅高永文當然氣定神閒喇。Sophia喺入政府前係港大醫學院外務助理院長兼護理系研究總監，又做過世衞顧問，做問責官員卻係新嘗試，相信佢都要一啲時間習慣吓。