政壇：肥仔明平租劏房搞公關
之前都講過新一代「富貴黨」經民聯喺金鐘海富中心，以幾萬蚊月租，租個過千呎嘅辦公室做總部。估唔到泛民中人都有呢個財力，佢就係離開政界轉戰公關界嘅白鴿黨「肥仔明」李華明，原來佢間公關公司都開喺海富中心，照咁睇佢應該豬籠入水喎！
點知佢話個辦公室只係百幾呎嘅「劏房」，所以月租都唔使一萬，平過經民聯好多。佢話唔少客戶係立法會中人同政府部門，所以租海富中心，都係貪佢夠方便啫。
做公關要靠樣搵食，最近肥仔明就唔合資格喇，因為佢啱啱做完激光手術，整走晒面上嘅疣同老人斑，塊面仲係紅到嚇親人。佢話手術係皮膚科聖手史泰祖處理，手勢好好，但點都要隔多一排至變靚番，呢排惟有用住電話溝通，少啲見客喎。最近白鴿黨新人經常出醜，記者問肥仔明有冇過兩招畀啲黨友，佢即刻一支箭咁標走。老手即係老手，犀利！
李華明做完激光手術之後，塊面紅到嚇親人。