政壇：潮商加會費掀退會風波

香港潮籍人士不嬲都好團結，成立九十一年嘅潮州商會更以和諧見稱，但近日商會尚未正式就職，已爆出鬧不和嘅傳聞。有人爆料畀我哋聽，話新任會長Stephen周振基上任之後，將常董、會董嘅會費大幅加價，常董會費更加至十萬元，但佢就竟然閂細水喉，只係畀咗二十萬，大家認為佢作風霸道，唔少老會長都非常有意見，更加有會董因此退會。

我哋搵到Stephen，佢解釋話，其實會費嘅加幅公平合理，原則係按比例計算，副會長畀會長嘅一半，常董就畀副會長嘅一半，餘此類推，佢話其實唔少社會團體都行緊呢一個系統㗎喇。佢話自己並冇畀少到會費，相反仲由以往嘅十五萬加至二十萬，只係舊年商會成立九十周年，上屆會長陳幼南畀多咗錢搞慶祝活動啫。

佢承認今年的確係因應通脹加咗會費，舊年會慶九十周年，商會已使咗唔少錢，加上商會規模漸大，活動較多，但帳目全部都清清楚楚。至於會慶費用，佢話會董係免費嘅，至於青委呢啲非會董級別雖然要畀錢，但商會都有津貼嘅。

佢又話會費加價係經過正規開會一致通過，預咗改革商會一定有反對聲音，不過呢啲只係短暫嘅誤會，大家都係想齊心做好會務啫。