政壇：社團三劍俠互撐入閘

年底將舉行港區全國人大換屆選舉，今屆相信亦係最激烈嘅一次，有意參選嘅人士都各出奇謀、施展渾身解數拉票，有人組隊聯合拉票，希望發揮協同效應，如果冇背景就惟有親力親為，逢左派場合必到，而且仲係好早到嗰種，拉得一票得一票。睇嚟今次人大選舉應該有啲睇頭。

港區全國人大得三十六個位，但有意競爭嘅接近八十人，要突圍而出真係要諗盡辦法。例如啲社團大佬就諗到條橋，新界社團聯會理事長陳勇、九龍社團聯會會長陳振彬、港島各界聯合會理事長蔡毅三人化身「三劍俠」，決定互相支持，逢親拉票時都提埋另外兩位個名，望透過各自唔同嘅票源，既有商界、親中團體同區議會，拉票事半功倍。

張明敏逢請必到

同樣想發揮協同效應嘅，仲有三位新早餐派立法會成員，包括中總廖長江、體藝文界馬逢國同金融界吳亮星，佢哋原來都會齊齊拉票，咁就可以節省好多時間喇！

如果唔合組拉票，亦唔代表冇機會，好似愛國歌王張明敏咁，聽聞佢最近逢請必到，逢到必早，好似前日「剛晶世紀聯婚」，佢就早早到場，希望可以向在場親中人士拉票。早排建仔籌款晚宴，佢更上台高歌一曲，似乎好緊張今次選舉。唔唱歌都可以嘅，競逐連任嘅羅范椒芬就集中火力炮製工作報告同整靚個網頁，方便選民睇吓佢做過乜嘢。