滅罪靠限人頭 懶官捉錯用神

好多人去樓上酒吧都係醉翁之意不在酒，毒販散貨，「毒青」開飯，援交妹兜客。咦，食衞局局長高永文三更半夜現身樓上吧喎，唔通佢都係喜愛夜蒲嘅飲食男女？

高永文去樓上吧唔係搵食，係補鑊至真。補乜鑊？唔使問嘞啩，樓上吧淪為罪惡溫床，前朝政府居然好似食咗迷幻藥咁，反應遲鈍，呆呆滯滯，搞到問題愈來愈嚴重。高永文新官上任自然想補番呢隻鑊，所以咯喎，尋日凌晨就採取踩場行動嘞，聯同警方等巡視咗油尖旺同中環蘭桂坊一帶嘅樓上吧。

警方掃蕩違規樓上吧，次次都掃出一大堆Ｋ仔、假酒同未成年少女，今次大鑼大鼓巡視一輪，又有乜成果呢？高永文係咁講嘅，關注樓上吧嘅治安、安全及環境問題，所以會進一步研究加強規管，例如話限制入場人數。

咦，當局似乎宿醉酒醒咯，終於肯扚起心肝做嘢，咁至係波o架嘛。之不過咁，樓上吧如雨後春筍，亂象叢生，係咪話掃就掃得乾淨呢？嗱嗱嗱，太一叮唔係長他人志氣，滅官員威風呀，你知啦，港產官僚好多都係吸食施政興奮劑嘅迷幻中年，官威上腦嗰下真係好high o架，執法係威係勢，點知藥力一過就成個謝晒，手軟腳軟似足一條軟皮蛇。如果呢種官僚作風唔改，高官晚晚踩上樓上吧都無用！

更重要嘅係，以限人頭措施掃除樓上吧亂象，就好似酒徒掟鏢，對錯焦囉。無錯，入場人數少咗，對居民嘅滋擾同火警危機睇嚟會減低小小，但係家陣嘅問題癥結係黃毒酒吖嘛，人少咗唔代表毒品同性罪行會減少。以不法商人嘅賊公計狀元才，話唔定以後用清幽隱蔽嚟做鐵竇嘅生招牌添，叮！

咁講啦，樓上吧嘅火警危機源於商業大廈本身嘅設計，而樓上吧變成罪惡溫床嘅主要原因就係當局巡查不足，先至畀不法商人有機可乘。當局靠限人頭處理樓上吧亂象，根本就係腳痛醫頭，捉錯用神。

當局勤於監管嚴厲執法，再配合收緊發牌標準，先至係解決之道。講到尾，樓上吧出現呢樣嗰樣諸多問題，禍源就係港產官僚懶放蛇執法，自己長年累月大食懶，叮！