政壇：政商定格：戴德豐抱孫開心到飛起
全國政協常委兼四洲集團主席Stephen戴德豐最近家有喜事，佢嘅二仔戴進傑幫佢添咗名乖孫，取名戴承亨。首次升呢做爺爺嘅Stephen開心到飛起，上周四晚喺酒店為孫仔擺百日宴，邀請城中政商界好友齊去飲杯。打上領呔嘅BB仔面圓圓，三爺孫成個餅印咁，難怪佢一講起個孫就笑到見牙唔見眼。問佢有冇送層樓畀乖孫，佢冇直接答，淨係笑笑口話送咗好多嘢畀乖孫，包括心形金器。
榮升爸爸嘅戴進傑就話，BB個名係大家一齊諗出來，家中添咗新成員個個都好開心。有「零食天王」稱號嘅Stephen，又有個花名叫「卡樂B大王」，呢個咁得意嘅BB為戴家帶來咁多歡樂，叫佢做「卡樂B」都好啱聽噃！
戴進傑（左）同太太誕下可愛囝囝承亨，一家三口幸福滿瀉。