政壇：政商定格：錯買「戀殖熊」波波好尷尬

身為「明愛之友」嘅發展局局長「波波」陳茂波，尋日出席明愛港島區賣物會主禮，仲喺賣物會巡咗一轉，買咗唔少嘢以表支持。話說波波買咗隻熊公仔，畀完錢至發現手上熊仔心口貼住英國國旗，仲大大隻字寫住「I LOVE LONDON」（我愛倫敦），即刻面色一沉心知不妙，點知就畀熱情嘅攤位職員拉住要求合照。盛情難卻，佢惟有起勢撳住「戀殖熊」嘅心口，一影完相即秒速將熊仔塞畀新聞秘書放入袋，逃離現場衝咗去個隔籬個中資銀行攤位，玩番轉遊戲，講番句普通話。得咗！咩罪咎感都冇晒！

波波前幾日喺立法會回應議員質詢時話，可以考慮以勾地表地皮興建公屋。佢尋日再補充，政府要先檢視總體土地供應再作決定，唔會側重一邊。原本話講完幾句佢就走o架喇，點知轉頭又見佢喺會場流連忘返。原來佢係同一眾明愛之友歎咖啡敍舊去。