政壇：搞搞政：拒入白鴿黨 葉建源成搶手貨

張文光霸住立法會教育界議席多年，議席不單係教協嘅資產，亦係白鴿黨嘅囊中物。白鴿黨幾經辛苦，至成功游說教協主席馮偉華循教育界出選，再經長時間游說，佢至肯加入白鴿黨。點知人算不如天算，喺臨門一腳佢因病唔參選，葉建源臨時拉伕接替，但佢點都唔肯加入白鴿黨。

原來除咗白鴿黨外，同係民主派嘅公文袋同工黨都曾接觸葉建源，力邀佢加盟。有工黨中人話，雖然葉建源同佢哋立場唔係咁一致，但由於工黨處於啱啱起步階段，任何合適人士都會考慮邀請加盟。此外，攞到兩席嘅公共專業聯盟亦已頻頻搵葉建源摸底。

忽然變成搶手貨，葉建源承認各政黨都有人拉攏過佢，又話佢哋講嗰陣唔算太認真，唔知算唔算係邀請。佢又話雖然有時覺得一個人做晒所有嘢有少少辛苦，但暫時仍非常享受獨立生活，唔想咁快「嫁」入政黨畀人綁住。不過講講吓，佢又話公專聯唔綑綁投票嘅立場都算幾特別，起碼講嘢前唔使下下都要問個黨應該點答。睇嚟佢雖然未有意願，但有啲傾向喎！