政壇：李鋈麟成功瘦身靠食齋
李氏宗親會日前就職，擔任董事會主席嘅東華三院總理Alan李鋈麟滿場飛，發覺佢瘦咗一圈，步履輕盈，原來佢轉咗食齋近半年，已瘦咗近二十磅，成個人恍如脫胎換骨，西裝都買細咗兩個碼。
轉食齋嘅因由，Alan話要由佢生日講起。半年前佢同老友大搞生日派對，飲到不亦樂乎，點知其後老友爆咗腦瘤危殆，嗰一刻錢同人面都買唔到朋友條命，惟有誠心祈求黃大仙，用食素一年嚟做交換條件。最後老友幸保性命，佢就遵守承諾至今，依家連搭飛機都會預先訂素食餐。
宗親會一向予人「老餅」感覺，佢話誓要進行大改革，笑言自己加入之後，已將平均年齡大大降低，未來會致力吸納青年才俊加入，為宗親會注入活力。
李鋈麟（左）瞓身搞好會務，老友兼前主席李三元都力撐。