香港大學校長徐立之日前出席一個活動時，有記者行過佢身邊，唔小心踢到佢隻腳，佢笑笑口話踢到腳唔緊要，唔好扑到個頭就得喇。佢咁講，原來早幾日佢真係不幸「中頭獎」，至今猶有餘悸。
「出事」當日，徐校長出席一個學校舉辦嘅活動，同大量記者逼埋喺一個狹窄嘅場地，本來已經寸步難移，點知混亂間，其中一個攝影記者胸前嘅相機鏡頭，唔小心扑親佢個頭，佢額前即時起咗層樓，到依家都仲未散晒瘀。其實港大有個咁宏偉美觀嘅校園，大把場地搞活動啦，下次搵個合適嘅地方，咁咪可以避免同類型「慘劇」囉！
徐立之慘被鏡頭扑親頭，額頭無辜辜起咗層樓。
