政壇：麥瑞琼轉戰人策會

梁振英政府一直關注民生問題，上個星期一口氣公布人口政策督導委員會（人策會）同扶貧委員會兩張名單，由於兩個委員會都牽涉基層家庭、人口老化、貧窮等問題，好多委員都係嚟自社福界、學術界等，個個名都熟口熟面，有啲仲跨範疇添！唔通真係人才凋零？十個煲九個蓋，冚極都冚唔掂？

社聯分工有系統

出名忙兼公職多籮籮嘅零售管理協會主席麥瑞琼，一直搞開最低工資，今次肯做人策會成為少數嚟自商界嘅委員，佢話主要係有啲公職任期就嚟滿，所以政府搵佢嘅時候，佢冇乜考慮就應承。咁係咪意味住唔再做最低工資委員會呢？佢就話低資會任期去到出年二月尾先完，依家講做唔做實在太早喇，但就話自己已經做咗兩屆，頭尾成四年，真係乜都夠啦！

咁又係呀，由臨時最低工資委員會做到最低工資委員會，睇住最低工資由無變有，依家仲加到三十蚊，當中爭拗真係有血有淚呀。至於會唔會推薦接任人選，麥瑞琼話商界邊個做都唔緊要，最緊要係按番委員會一貫準則，以不偏頗態度同埋數據為依歸，去檢討最低工資水平就得喇。

至於社聯行政總裁方敏生，明明喺扶貧委員會籌備小組幫手重設扶貧委員會同揀人選，結果响扶委會名單公布前，佢喺人策會就榜上有名，佢當時就唔肯講自己係咪唔做扶委會，只係話名單建議咗畀政府，就由政府揀人啦，佢做唔做唔緊要，最緊要係有社福界參與咁話。兩日後扶委會名單公布，結果籌備小組另外三名成員順利過渡，而社聯就派政策研究及倡議業務總監蔡海偉做代表，好明顯社聯係好有系統咁分工啦。