安撫超額教師 殺校危機未除

政務司司長林鄭月娥有個外號叫「好打得」，最近又多咗個花名，叫「官場奶媽」。

點解？因為佢成日要「湊仔」囉。教育局局長吳克儉拆唔掂國民教育炸彈、發展局局長陳茂波搞唔掂新界東北發展計劃風波、民政事務局局長曾德成擺唔平啟德體育城爭拗，全部要勞煩佢出嚟拆彈解畫。唔怪得有人話，如果當局對學生嘅照顧亦係咁無微不至，殺校及縮班問題就唔會搞到滿城風雨啦，叮！

呢嗱，官場奶媽又出動嘞。林鄭月娥同吳克儉一齊會見十八區中學校長代表，商討殺校危機，唔知係咪有人傍住可以壯膽，吳克儉今次零舍進取，會後即刻宣布緩兵方案，將超額教師嘅保留期由一年延長至三年，話希望唔會有教師喪失教席喎。

吳克儉今次有林鄭月娥陪同壓陣，又有新方案做手信，學界應該唔會媽媽聲嘞啩？係就係無媽媽聲，不過鞋鞋聲啫，學界批評，新方案對解決殺校問題根本係隔靴搔癢，搔不到癢處。

梗係啦，殺校危機源於收生不足，當局唔諗計降低開班人數下限，反而凍結超額教師議席，根本就係本末倒置。如果連學生都冇，保留超額教師又有乜意義呢？唔通叫佢哋對住空氣講書咩！

咁講啦，保住教師飯碗係好事，但要解除殺校危機，始終要搵到足夠學生，教育局唔肯面對現實，對症下藥，一味推出緩兵之計，只會令危機愈滾愈大o架咋。讀書要識靈活變通，施政亦要靈活變通，學界一直爭取以彈性收生作過渡安排，當局點解唔肯接受呢？係因為死牛一便頸吖，定係慣咗做嘢是是但但，求求其其呢？

為官同讀書一樣，要有三到，眼到、手到、心到。要拆解殺校炸彈，消除教師疑慮，吳克儉唔使出動官場奶媽o架，只要閣下肯做學界奶媽，以關懷學生嘅出發點處理問題，咁就唔會誤人子弟，搞出大頭佛啦。

話時話，當局誤人子弟早有前科。近年教育改革翻來覆去玩殘學生，新政府上場以為可以過平靜日子啦，點知先鬧出國民教育風波，依家又爆出殺校炸彈，簡直永無寧日。

總而言之，官場奶媽又好，學界奶媽都好，快快趣趣同學界坐低拆掂佢，唔好搞到嘈喧巴閉，添煩添亂，叮！