SUN奇古怪：SUN潮語

最近有行會成員，疑似在政府推出辣招打擊樓市之前，被傳媒揭發偷步賣樓。事後那位行會成員愈描愈黑，最後佢難逃「被休假」嘅命運。呢種突然人間蒸發嘅舉動，用潮語去講就叫做「潛水」。

「潛水」本來係一項有益身心嘅活動，但潮語話一個人「潛水」，通常都帶點貶義。喺網上討論區或社交網站，有啲人因講錯嘢而被恥笑，通常做法都係立即「潛水」，消失一排等風聲無咁緊先至再蒲頭，又或者改名換姓重新出現，因為喺網絡世界，一人可以分飾多角。

不過最忌係衰咗都仲要死撐，又或者化身第二個人留言撐自己，呢啲可以話係網絡大忌，咁就大鑊！出事者隨時被網民大起底，到時想「潛水」已經太遲。就好似早輪有位待嫁港女喺自己facebook度，發表膠論講明人情要做幾錢，又話無錢做人情就唔好嚟飲云云，佢呢番言論隨即被勁插，兼被網民大起底，仲推到上主流傳媒。佢唔認錯不特止，佢仲疑似用佢男朋友身份，繼續死撐，我諗呢位港女今次唔止要「潛水」，直頭要潛逃先搞得掂。

除咗出咗事要「潛水」之外，有啲人突然唔想見人，終日躲藏喺屋企唔搵朋友，或者約親都唔出現，都可以叫做「潛水」。有啲人失戀或經歷咗一啲挫折都會選擇以「潛水」去逃避現實。不過，有啲政治人物喺香港水深火熱期間突然休假，你又唔好話佢因逃避責任而「潛水」，因為佢休假嗰陣真係去咗泰國「潛水」！佢係邊個？自己諗啦！