政壇：林鄭訪歐難得鬆一鬆
新一屆政府上場後，政務司司長林鄭月娥就做咗救火隊，國教科、新界東北都要佢撲火，近排又見佢隔日就陪教育局局長吳克儉同教育界人士會面，連同校長磋商都要好似湊仔咁陪住吳克儉。尋日政府發新聞稿，披露林鄭將會外訪英國同西班牙六日，今次總算可以鬆吓啩。
林鄭上任前後，唔止一次透露家人唔喺身邊，因為佢先生同兩個仔都喺英國，佢本來都買定物業去英國住，只因更上一層樓做政務司長，先繼續一個人喺香港嘅日子，今次佢十一日晚飛倫敦，十五日去西班牙。喺倫敦嘅三日中，行程包括去貿發局嘅晚宴、英國文化協會嘅論壇，同英國國會議員、官員見吓面，或者可以趁活動中間，抽時間見吓家人。早排接受訪問先直認寂寞嘅林鄭，呢一程應該唔使呻嘞啩？