政壇：女童軍總會高層是非多

由富豪高官太太做高層嘅香港女童軍總會一○年選總監鬧出軒然大波後，近日又是非滿天飛，有投訴話現任總監彭徐美雲有意向前朝遺臣、現任總幹事曹周麗智開刀，理由係曹太冇大學學位，唔符合入職要求。不過又有人反指彭太提拔包括自己在內一批知名人士做副會長，為自己退任後鋪路喎。

曹太冇大學學位早喺一○年已畀人翻出嚟講過，女童軍總會當時亦解釋話從來冇要求有大學學位。點解今次又掀波濤呢？求證時又有人話，彭太日前向有投票權嘅成員發電郵，推薦自己在內八位社會賢達做副會長，但有成員質疑彭太仍然係總監，為乜要做副會長？彭太見群情洶湧，於是退選。

由於實在太離奇，我哋於是搵彭太回應，彭太澄清並非佢自己想選副會長，只係有人提名佢，但後來因為想尊重其他人意見，所以自行退選。女童軍總會班高層真係要諗諗點解內部不時有「告密」同「搞是非」嘅現象？